एनएमबी बैंकले भोटेकोशी बाढी प्रभावितका लागि ३ करोड ५१ लाख रूपैयाँ सहयोग गरेको छ।
भोटेकोशी नदीमा आएको विनाशकारी बाढीबाट प्रभावित नागरिकहरूको राहत तथा पुनर्स्थापनामा सहयोग पुऱ्याउने उद्देश्यले एनएमबी बैंकका सञ्चालक समितिका अध्यक्षले 'प्रधानमन्त्री दैवी प्रकोप उद्धार कोष' मा जम्मा हुने गरी तीन करोड ५१ लाख रूपैयाँ रकमको चेक अर्थ मन्त्रीलाई हस्तान्तरण गरे।
साथै, बैंकले उक्त प्रभावित क्षेत्रका नगरिकहरूका लागि दश लाख रूपैयाँ बराबरको राहत सामग्री समेत प्रदान गरेको छ।
अचानक आएको भीषण बाढीका कारण रसुवा, नुवाकोट, धादिङ, गोरखा तथा चितवनलगायतका नदी तटीय क्षेत्रमा ठूलो क्षति पुगेको छ।
बाढीले जनधनको क्षति हुनुका साथै धेरै घर परिवार विस्थापित भएका छन् भने सडक, स्थानीय पूर्वाधार र जलविद्युत आयोजनाहरूमा समेत ठूलो असर परेको छ।
यस कठिन परिस्थितिमा प्रभावित नागरिकहरूको साथमा उभिँदै बैंकले उक्त सहयोग प्रदान गरेको हो।
यसबाट बाढी प्रभावितको उपचार, खाद्यान्न तथा आवासको व्यवस्था र क्षतिग्रस्त संरचनाको पुनर्निर्माण तथा पुनर्स्थापना जस्ता कार्यहरूमा सहयोग पुग्ने बैंकले विश्वास लिएको छ ।
